Новый председа влады бы на основі інформацій Пресовой аґентуры СР бы міг взыйти з двоїці Петер Кажімір і Петер Пелеґріні. Кресло ся увольнить, кедь Роберт Фіцо подасть демісію. В новій владі, котра буде мусіти в парламенті знова жадати о довіря, уж немать сідіти Роберт Каліняк, котрый ознамив демісію іші перед Фіцом. Іші скоріше з влады одыйшов Марек Мадяріч, котрый по вбистві новинаря Яна Куцяка і його приятелькы одступив з функції міністра културы. Як Калиняковый наступник ся споминать штатна секретарька резорту внутра Деніса Сакова. В медіях ся обявило і мено Мартіна Ґлвача, котрый але повів, же хоче зостати в парламенті. При позиції міністра културы звучать три мена – Душан Ярябек, Ян Подманіцкы і Ерік Томаш. Зміна наісно буде і на міністерстві справодливості. Луція Жітнянска вырішыла, же в будучій владі, котра мать взыйти по Фіцовій демісій, небуде продовжувати. Єй партійный колеґа, міністер жывотного оточіня Ласло Солімош Пресовій аґентурі СР підвердив, же як бы го партія знова номінувала, функцію міністра бы прияв.
(TASR)