Чеська новинарька Петра Голцова твердить, же Ян Куцяк пришов перед тым, як го забили, на новы повязаня меджі політіками владной партії Smer-SD і бізнісменами з Італії. Писав їй о тім в середу пополідне, значіть в день, коли го правдоподобно забили. Голцова про словацькый портал Topky.sk повіла, же собі з Куцяком писали і дакілько раз за день. Останій раз в середу о пів четвертой пополідне, коли їй мав загнати, же пришов на новы повязаня меджі бізнісменами і далшыма політіками партії Smer-SD. Новинарька подля властных слов знать, о што іде, но не може о тім бісідовати. Голцова є основательков Чеського центру про інвестіґатівну журналістіку. З Куцяком співпрацовала на дакілько кавзах включно остатньой о бізнісменах з Італії на выходній Словакії.
(Петро Медвідь)